संस्कृति पर्यटन तथा नागरिक उड्ययन मन्त्री रवीन्द्र अधिकारीले पोखरा क्षेत्रीय अन्तर्राष्ट्रिय विमानस्थल निर्माणका लागि थप जग्गा अधिग्रहण नगर्ने स्पष्ट पार्नुभएको छ । बुधबार निर्माणाधीन विमानस्थलमा टर्मिनल भवनको शिलान्यास गर्दै उहाँले विमानस्थलका लागि थप जग्गा आवश्यक नपर्ने भएकाले ढुक्क हुन पोखराबासीलाई आग्रह गर्नुभयो ।
विमानस्थल निर्माणका लागि अव जग्गा अधिग्रहण नगरिने उल्लेख गर्दै मन्त्री अधिकारीले अनावश्यकरुपमा हल्ला नफिजाउन उहाँले सरोकारवालाहरुलाई आग्रह गर्नुभएको हो । मन्त्री अधिकारीले रन वे का लागि थप जग्गा आवश्यक नभएको समेत वताउनुभएको छ । पोखराको भौगोलिक अवस्था अनुसार १९२ देखि २०० सिट क्षमताको जहाज मात्र उड्ने र त्यसका लागि अहिलेको २ हजार ५ सय मिटरको रन वे नै पर्याप्त हुने मन्त्री अधिकारीको भनाइ थियो । रन वे बढाउँदैमा विमानस्थलको क्षमता नबढ्ने अधिकारीले स्पष्ट पार्नुभयो । विज्ञले भन्दैमा आत्तिइहाल्न नपर्ने बताउँदै उहाँले रन वे बढाउने कुनै योजना नभएको उल्लेख गर्नुभयो ।
विमानस्थलका लागि पेट्रोल भण्डारण र हृयांगरका लागि जग्गा अधिग्रहण गर्ने हल्ला चलिरहँदा मन्त्री अधिकारीले अब कुनै पनि कामका लागि तत्काल जग्गा अधिग्रहण गर्न आवश्यक नरहेको वताउनुभएको हो । उहाँले पेट्रोल भण्डारण र हृयांगरका लागि जग्गा चाहिए अहिले विमानस्थलभित्रै बनाउन सकिने र थप जग्गा चाहिए स्थानीयलाई चित्त बुझाएर खरिद गर्न आफूले निर्देशन दिइसकेको जानकारी दिनुभएको छ ।
यसैवीच, निर्माणाधीन पोखरा क्षेत्रीय अन्तर्राष्ट्रिय विमानस्थलमा टर्मिनल भवन निर्माण कार्यको शिलान्यास गरिएको छ । टर्मिनल भवनको पर्यटन तथा नागरिक उड्डयन मन्त्री रवीन्द्र अधिकारीले बुधबार शिलान्यास गर्नुभएको हो । शिलान्यास गरिएको सो टर्मिनल भवन मिड जुलाई २०२० सम्ममा निर्माण सक्ने विमानस्थल निर्माण कम्पनी सिएएमसीले जनाएको छ । कम्पनीका अनुसार कुल १४ हजार वर्ग मिटरको टर्मिनल भवन बन्नेछ । टर्मिनल भवन अन्तर्राष्ट्रिय उडानका लागि ८ हजार र आन्तरिक उडानका लागि ६ हजार वर्गमिटरकोे क्षेत्रफलमा निर्माण गरिने जनाईएको छ ।
आगामी असोज महिनादेखि विमानस्थलको रन वे को निर्माण कार्य शुरु गरिने भएको छ । सन् २०१९ को जुन वा जुलाई सम्ममा रन वे निर्माण सम्पन्न हुने मन्त्री अधिकारीले वताउनुभयो । सन् २०१९ बाटै उक्त रन वे लाई आकस्मिक अवतरणको लागि सञ्चालनमा ल्याईने जनाईएको छ । मन्त्री अधिकारीले पोखरा विमानस्थलको काम अत्यन्तै तीब्र गतिमा संचालन भइरहेको भन्दै सम्झौता अनुसार सन् २०२१ सम्ममा पूर्ण रुपमा सञ्चालनमा आउने दाबी गर्नुभयो । पोखरा अन्तर्राष्ट्रिय विमानस्थलमा वार्षिक ५ लाखले हवाई यात्रा गर्नसक्ने छन् । तर, यो दैनिक १२ घण्टाको दरले मात्र हो । चौबिसै घण्टा खुल्ला गर्ने हो भने यो ठ्याक्कै दोब्बर क्षमताको हुनेछ ।
Published at:
0 Comment:
Post a Comment